Михајловиќ сменет, Броки негов наследник

0
429

Фудбалскиот клуб Милан му врачил отказ на тренерот Синиша Михајловиќ и на наговото место го назначил Кристијан Броки, пренесуваат италијанските медиуми. Михајловиќ е сменет два дена по поразот од Јувентус (1:2). Српскиот стратег на почетокот на сезоната пристигна на „Сан Сиро“, на засилувања потроши 90 милиони евра, а на шест кола до крајот на првенството Милан се наоѓа на шестото место на табела.

Михајловиќ со Милан избори пласман во финалето на италијанскиот Куп, каде противник ќе му биде Јувентус, но не ја оствари целта, пласман во Лигата на шампионите. Милан од третата позиција е оддалечен недостижни 15 бодови.

Италијанските медиуми долго време ја најавуваа смената на Михајловиќ, но шпекулациите стивнаа по серијата од девет натпревари без пораз, во текот на првите два месеци од годината.

Сепак негативната серија од пет мечеви без триумф ја иницираше смената на српскиот тренер. Михајловиќ на клупата ќе го замени поранешниот играч на Милан, Кристијан Броки, кој од 2014 година го предводеше младиот тим на Милан.

Броки е петтиот тренер на Милан во последните три години по Алегри, Сидорф, Инзаги и Михајловиќ.