По Brexit, англискиот повеќе нема да биде официјален јазик на ЕУ

0
1038

Поради тоа што освен Велика Британија ниедна друга земја во Европската унија (ЕУ) го нема англискиот јазик како официјален, тој би можел да го изгуби статусот како официјален јазик на Унијата, предупредила Данута Хубнер, шеф на комитетот за уставни прашања при Европскиот парламент (ЕП), пишува Politico.

Англискиот е еден од 24-те официјални јазици на ЕУ, бидејќи Британија го има избрано како свој официјален јазик, изјавила Хубнер. Но штом Британија го заврши процесот на излегувањето од ЕУ, англискиот јазик би можел да го загуби својот статус.

„Имаме правило што предвидува секоја земја да избере еден официјален јазик. Ирските го имаат избрано галскиот, Малтежаните го избраа малтешкиот јазик, така што само Велика Британија го има избрано англискиот јазик. Ако ја немаме Велика Британија, тогаш го немаме ни англискиот“, рекла Хубнер.

Таа додала дека англискиот е еден од работните јазици во европските институции, односно тоа е доминантниот јазик и јазик кој највеќе се користи од страна на административците при ЕУ. Доколку ЕУ сака да го задржи англискиот јазик како официјален, тогаш правилата на Унијата треба едногласно да се променат, рекла Хубнер.

Но извор од ЕУ додал дека и самите правила во однос на официјалните јазици се предмет на повеќе интерпретации. Правилото од 1958-та година кое се однесува на официјалните јазици на ЕУ, кое првично било напишано на француски, не определува јасно дали една земја членка, на пример Ирска или Малта, мора да име повеќе од еден официјален јазик, додал изворот. Интерпретациите на француската верзија укажуваат на тоа дека ова можеби е остварливо, додека пак англиската верзија го отфрла тоа./крај/мф/бс