СДСМ да го објави секој трансфер на пари на фирмата или ќе треба да се докаже на суд

0
619

Кабинетот на Претседателот, Ѓорге Иванов ги демантира тврдењата на портпаролот на СДСМ, Петре Шилегов, дека неговиот шура Сашо Тоневски има бизнис релации со фирми од Панама.

„Сметаме дека обидот преку лаги и манипулации да се претстави семејството на Претседателот Иванов како дел од криминална банда е крајно недолично и неодговорно однесување на една политичка партија. Ја повикуваме политичката партија СДСМ веднаш да го објави секој трансфер на пари преку таа фирма и да ги соопшти сите кои биле вклучени во било што на таа фирма, која патем е основана во Скопје и никогаш не проработела. Во спротивно, Шилегов ќе мора своите тврдења да ги докаже на суд. Фирмата „Делфино травел Балканс“ e основана во 2009 година во Скопје со сметка во ТТК Банка во Скопје и е избришана од Централен регистер во 2015 година, согласно Законот за трговски друштва ч.552-б“ се вели во реакцијата од Кабинетот на Претседателот.

Шилегов обвини дека братот на сопругата на Иванов, Маја Иванова, има бизнис релации со фирмата „Лип Корп Панама Сити“ од Панама.

„„Лип Корп Панама“ е основач и сопственик на фирмата „Делфино травел Балканс“. Сашо Тоневски, братот на Маја Иванова, е исто така еден од сопствениците и управител на оваа фирма, „Делфино травелс Балканс“. Пред само неколку дена, или во време кога почна да се шири скандалот со перењето пари во панамски фирми, „Делфино травел Балканс“ згаснува и ја бришат од Централен регистар“, изјави Шилегов./крај/мф