Без договор заврши втората средба меѓу Синдикатот на УПОЗ и Владата за барањата на вработените во судската и јавнообвинителската служба. До петок или следната недела треба да се одржи уште една средба.
На средбата, како што изјави претседателот на Синдикатот на УПОЗ Трпе Деановски, не добиле конкретен предлог од Владата.
„Волја има. Владата мисли дека ќе се изнајде решение за овој проблем меѓутоа конкретна понуда се уште нема. Преговорите ќе продолжат уште еднаш или двапати. До петок треба да се финализира Буџетот за наредната година за да може и ние да добиеме поконкретни податоци што и како се планира од страна на Владата во врска со нашите барања“, изјави Деаноски по средбата.
Од Синдикатот на УПОЗ се надеваат дека ќе се најде некоја, како што велат, златна средина, околу нивните барања.
По неколкунеделни протести на вработените во судската администрација, минатата недела Синдикатот на УПОЗ и Владата седнаа на разговори со цел да се изнајде заедничко прифатливо решение за нивните барања за 78 проценти зголемување на платите и исплата на додатоците за плата.
Вицепремиерот за економски прашања Фатмир Битиќи објави дека владината работна група повторно се сретнав со претставниците на Синдикатот на УПОЗ, каде заеднички реафирмирале дека само низ инклузивен и транспарентен дијалог и со взаемно почитување може да ги решиме прашањата поврзани со вработените во судската и јавно-обвинителската служба.
„Блиску сме до изнаоѓање на взаемно прифатливо решение, кое истовремено ќе значи унапредување на социјалниот дијалог, бидејќи Владата е целосно посветена на принципите на водење на отворен и инклузивен социјален дијалог со сите синдикални организации.
Проблемите ги решаваме преку пронаоѓање на системски, праведни, правични и солидарни решенија за сите отворени прашања во државата“ вели Битиќи.
