До 31. јули, Битола ќе наликува на една голема сцена, со 65 настани на различни локации. Фестивалот „Илинденски денови“, кој е дел од програмата на Битолското културно лето Битфест, 15-то по ред оваа година, носи над 1.200 гости од Ирска, Италија, Мексико, Чиле, Грузија, Хрватска, Србија, Бугарија и Македонија кои настапуваат на многу локации низ градот.
На втората вечер на традиционална музика и игра настапија КУД 8- ми Октомври од Крива Паланка, Фолклорната група од Сицилија, Италија, КУД Дримкол од Вевчани, фолклорната група од Родина, Варна, Бугарија, КУД 7- ми Септември Македонски Брод, Ансамблот од Грузија, ДМБУЦ Илија Николовски Луј од Скопје и групата од Мексико.
Посебна презентација после овие настапи имаа групата од Ирска на плоштадот Магнолија, а тука беше и фолклорната прошетка низ светот со КУД Тена од Џаково, Хрватска пред Офицерскиот дом.
“Илинденски денови” е амбасадор на македонската култура во светот. Фестивал што започна скромно како републички фестивал на народни песни и игри пред повеќе од половина век, а прерасна во интернационален и е единствен фестивал од Македонија што е во елитата на фолклорни фестивали во светот.
