Турскиот министер за внатрешни работи, Али Јерликаја, изјави дека „еден терорист се разнесе, а вториот е неутрализиран“ во терористичкиот напад врз седиштето на турската национална полиција во главниот град Анкара.
Турскиот министер вели дека експлозијата се случила околу 9:30 часот по локално време на 1 октомври пред седиштето на Министерството за внатрешни работи.
Во областа каде се случил нападот има и неколку други министерства и турскиот парламент, кој денеска треба повторно да биде отворен по летните одмори, со обраќање на претседателот Реџеп Таип Ердоган, јавуваат турските медиуми.
Јерликаја во објавата на социјалните мрежи напиша дека терористите се доближиле до зградата на полицијата со лесно комерцијално возило и дека еден од нив го активирал експлозивот и се разнел, а вториот, додаде, бил „неутрализиран“ во престрелката со полицијата која следела, во која двајца полицајци, исто така, биле полесно ранети.
Обвинителството во Анкара соопшти дека отвора истрага и забрани пристап до областа.
