Виртуозите Влатко Стефановски и Теодосиј Спасов на Деновите на Св.Кирил во Рим

Google+ Pinterest LinkedIn Tumblr +

Во Палатата Брачи на Музејот во Рим, во рамки на програмата на манифестацијата „Македонија во чест на Св. Кирил“, се одржа заедничка културно – уметничка програма од страна на Mинистерствата за култура на Република Македонија  и Република Бугарија, на која настапија музичките уметници со светско реноме, Влатко Стефановски и Теодосиј Спасов.

Настанот, на кој присуствуваа и министрите за култура на Република Македонија и Република Бугарија, Роберт Алаѓозовски и Боил Банов, митрополитите на МПЦ Пимен, Јосиф,  бискупот д-р Зоран Стојанов и други видни гости, започна со изложба во музејот „Museo di Roma“ на италијанскиот (венецијански) уметник Каналето (1697-1768), потоа следуваа обраќања на министерот Алаѓозовски и министерот Банов, и на крај музичкиот дел со Влатко Стефановски и Теодосиј Спасов.

Во обраќањето пред присутните, министерот за култура на Република Македонија, Роберт Алаѓозовски го истакна неговото задоволството што со автентичниот концерт на добрите пријатели и светски музичари – Влатко Стефановски и Теодoсиј Спасов, го празнуваме Денот на сесловенските просветители  Св.Кирил и Методиј и на тој начин се поклонуваме пред нивното грандиозно дело.

„Нашата земја, речиси пет децении преку манифестацијата „Македонија во чест на Свети Кирил”  е дел од  глобалното одбележување на неуморната работа на словенските просветители, кои преку својата мисија го поврзаа Истокот и Западот и оставија богато духовно наследство за човештвото. Годинава, задоволството на традиционалното празнување во Рим за нашата земја е уште поголемо, зашто го одбележуваме овој ден заедно со нашите пријатели од Република Бугарија, на највисоко институционално ниво. И низ ова заедничко чествување, ја демонстрираме нашата недвосмислена определба за унапредување на добрососедските односи, продлабочување и интензивирање на соработката во културата и во сите други области. Верувам дека владите на двете пријателски земји ќе продолжат заеднички се залагаат за прогресивни општествени процеси кои ќе обезбедат рамноправни европски перспективи за целиот регион“, нагласи министерот Алаѓозовски.

Тој изрази убедување дека и покрај предизвиците во регионот, како и глобалната политичка слика која станува се посложена и претставува предизвик за целото човештво, Македонија и Бугарија, нашите народи, нашите уметници и културни работници, во духот на заедничките светли традиции и богатото културно наследство, ќе бидат достојни на овие предизвици и ќе работат  посветено на градење на поубава, заедничка иднина и просперитет за сите наши граѓани, во Европа од 21 век.

„Манифестацијата за одбележување на Денот на Св. Кирил, токму во Рим, е уште една потврда дека културната и религиската разноликост се вистинско богатство и предност на секоја земја.Тие се извор на голем креативен потенцијал и мост на меѓусебно разбирање и почитување. Затоа, нашите напори се и ќе бидат насочени кон воспоставување на вистински културен дијалог, во нашата земја, во регионот а и пошироко, преку кој ќе го сочуваме мирот и стабилноста, ќе ги  следиме највисоките идеали на современиот свет и ќе ја испратиме пораката  дека Македонија ѝ припаѓа на модерна Европа и е нераскинлив дел од европското семејство“, рече Алаѓозовски.

Според македонскиот министер за култура, Владата и Министерството продолжуваат со политиките на поддршка, заштита и негување на непроценливото културно и духовно наследство што го имаме, како и со поддршка на високите вредности во уметноста и нивна афирмација во светот. Културата не познава граници, рече Алаѓозовски, токму затоа што големите и вистински уметници во практика ги применуваат политиките за културен дијалог и зближување меѓу народите, претворајќи се себеси и нивните дела во мостови за меѓусебно разбирање и комуницирање и платформи за изградба на нови, заеднички културни и естетски вредности.

„Вечерва, во духовното средиште на светската култура и цивилизација, пред нас ги имаме виртуозите Стефановски-Спасов, кои посветија голем дел од нивното творештво градејќи такви мостови на соработка, врвни артисти кои постојано ја истражуваат, ја надополнуваат и ја збогатуваат музичката традиција на двете земји, создавајќи нова богата музичка слика која во светот го проектира духовното богатство на регионот“, истакна Алаѓозовски.

 

 

Share.