Викендов на Стадионот на АРМ во Скопје ќе се одржи културно музичкиот фестивал Skopje Calling 2024. Како што најавија од Авалон Продукција, на фестивалот ќе настапи светската ѕвезда Грејс Џонс, а втората вечер е резервирана за Севдализа.
Една од највлијателните и најреволуционерни музички ѕвезди и уметнички појави, Грејс Џонс, го носи своето спектакуларно live show за прв пат во Македонија, на 6-ти јули, каде ќе настапи со 12 врвни музичари.
„Грејс oстанува во Скопје цели 3 дена, после што ја продолжува својата летна турнеја во Лондон. Кога се нејзините барања и рајдер во прашање – oд изборот на вино, шампањ и морска храна, до техничките спецификации за звук и светло, слободно можеме да кажеме дека се работи за најспецифичниот и најдетален рајдер кој сме го имале досега“, истакнуваат организаторите Авалон продукција.
За официјално затворање на фестивалот Скопје Колинг и како втор, посебен фестивалски ден Авалон ја носат креативната, независна, авангардна артистка која e пред своето време. Во духот на овогодинешното издание на Скопје Колинг, на кое, се разбира, главната позиција ја има, без никакво претерување легендарната и голема Грејс, како артистка позната по поместувањето на граници и креирањето на она кое ние денес го викаме, не само ,,поп култура”, туку и ,,суб култура”, беше повеќе од природно во рамките на официјалното “closing party” на фестивалот да настапи артистка која (како и Грејс со нејзиното појавување на сцената), ги поместува културолошките граници на 21 – от век со својата мулидимензионална уметност и навистина креативна и футуристичка визија. Сиве овие погоре напишани епитети ги има токму Севдализа. Преку фузијата на електроника, трип – хоп, експериментален поп и алтернативен R&B, таа создава хипнотичка музика чиј главен фокус е индивидуалната и женска моќ. Моментално актуелна на светските топ листи со синглот ,,Ride or Die Pt. 2”, таа оваа сезона има и висока позиција во лајн – апите на многу од најголемите фестивалски сцени во Европа и светот.
