Кардинале доаѓа во Битола со својата ќерка Клаудија

Google+ Pinterest LinkedIn Tumblr +

Како што е познато на овогодинешниот 39. Интернационален фестивал на филмската камера „Браќа Манаки“, кој почнува в сабота и трае до 29 септември доаѓа италијанската и светски позната филмска актерка Клаудија Кардинале која ќе учествува на свеченото отворање и лично ќе ѝ биде врачена специјална златна „Камера 300“ за особен придонес во светската филмска уметност.
Филмската дива в петок пристига со авион во Скопје. Ќе ја чека автомобил кој веднаш ќе ја однесе во градот на конзулите. Кардинале доаѓа во Македонија заедно со ќерка си, која исто така се вика Клаудија. Ќе биде сместена во хотелот „Епинал“. И покрај скромните барања, организаторот ќе се потруди да ѝ обезбеди пријатен престој на големата актерка. Единствено специфично барање е да ѝ биде дозволено да пуши, како претходно што ѝ беше излезено во пресрет и на филмската дива Катрин Денев кога дојде во Битола.
Претходни ѕвезди што дојдоа во Битола се и Жулиет Бинош, Изабел Ипер, Викторија Абрил и Дерил Хана.

Клаудија Кардинале е со импозантна филмографија од над 175 улоги во филмови, телевизиски серии и краткометражни филмови. Во нејзината богата кариера настапувала заедно со филмските партнери Марчело Мастројани, Берт Ланкестер, Ален Делон и други.

Кардинале во својата исклучително богата кариера има освоено над 35 награди и признанија на значајни светски филмски фестивали. Таа исто така е позната како борец и активист за женските права и од 2000 година е амбасадор на добрата волја на УНЕСКО.

– Клаудија Кардинале беше прогласена за една од најубавите 50 жени во филмската историја, во својата кариера има освоено над 35 награди и признанија, а веруваме дека со задоволство во своите раце, на фестивалската сцена во Битола, ќе ја држи и златната „Камера 300“ – истакна Гена Теодосиевска, директорка на ИФФК „Браќа Манаки“, на прес-конференција во Скопје.

Организаторите на ИФФК „Браќа Манаки“ информираа дека натпреварувачкиот дел од годинешната програма ќе го оценува стручно жири предводено од Олимпија Митилинау, кинематограферка од Грција.

Фестивалот и годинава е поддржан од Општина Битола.

Share.