Повторно поништен јавниот повик за финансиска поддршка на авиокомпании

Google+ Pinterest LinkedIn Tumblr +

Министерот за транспорт и врски Горан Сугарески денеска објави дека повторно е поништен јавниот повик за финансиска поддршка на авиокомпании што беше објавен на 13 септември годинава.

На денешната прес-конференција во Владата, Сугарески информираше дека до крајниот рок е доставена само понуда од Визер, но таа не одговара со условите и критериуимите во тендерот.

Авиокомпанијата Визер доставила понуда во која сите четири дестинации од аеродромот „Свети Апостол Павле“ во Охрид, планира да ги воведе во август 2019 година што е спротивно на еден од критериумите во тендерот.

„Во повикот јасно стои дека авиокомпанијата има обврска до 10 јануари 2019 година да воведе две линии од аеродромот во Охрид и уште две во рок од една година од потпишувањето на договорот. Авиокомпанијата Визер понудила сите четири дестинации да ги воведе во август 2019 година. Поради ова, комисијата констатираше дека условите од јавниот повик не се исполнети и даде препорака овој јавен повик да се поништи. Оваа фактичка состојба не ми остава никаква друга можност освен доследно почитувајќи ја уредбата и јавниот повик повторно да ја поништам и оваа постапка“, нагласи Сугарески.

Тој додаде дека Владата останува доследна на мерката за финансиска поддршка за авиокомпании кои ќе понудат нови дестинации за македонските граѓани и оти средствата за субвенционирање се веќе предвидени во буџетите.

Министерот информира дека по итна постапка ќе достави до Владата информација со која во најкраток рок ќе се усвои неопходната уредба и веднаш потоа Министерството за транспорт и врски ќе објави нов јавен повик.

„Критериумите и условите нема да ги менуваме, тие ќе бидат исти како и на претходниот јавен повик“, истакна Сугарески.

Share.