По барање на Владата на Република Северна Македонија, консултантската куќа Планет го изработи стратешкиот документ „Патоказ за праведна транзиција“, кој официјално, на веб страницата на Министерството за економија, беше објавен на 8 август 2023 година. Претходно, оваа консултантска куќа работела на проблематиката на Праведната транзиција во Република Грција и изработила планови за праведна транзиција во дел од земјите на Европската унија.
Во извршното резиме на овој документ се наведува дека патоказот нанапред е комбинација од повеќе патеки, односно правци, коишто имаат за цел да им одговорат на потребите утврдени во регионите со јаглен. Тоа се: Патеката на чиста енергија, Патека на приватни инвестиции и стартапна економија, Патека на зелените и паметните инфраструктури и Патека на развивање на вештините
Третата, односно Патеката на зелените и паметните инфраструктури, ги опфаќа локалните перспективи на регионот. Подобрувањето на животот во регионите со јаглен подразбира многу работа ширум целиот спектар на општинската инфраструктура – енергетска ефикасност на објектите, водата и отпадната вода, јавниот превоз, цврстиот отпад и централното греење. Освен тоа, засегнати се и домаќинствата и бизнисите. Се работи и за менување на уверувањата и ставовите, главно преку меки мерки. Затоа, во согласност со Зелената агенда за Западен Балкан и искуствата на другите градови од поширокиот регион со иста големина и карактеристики, потребно е залагање за засилување на амбициите за различните видови проекти за зелена инфраструктура и паметни градови и во сродни области.
Проектот „Подобрување на енергетска безбедност на Пелагонискиот регион преку процесот на Праведна транзиција – состојба на ресурси, искуства со Република Грција и споредба на националните стратегии“ е развиен со поддршка на регионалниот проект СМАРТ Балкан – Граѓанско општество за поврзан Западен Балкан имплементиран од Centar za promociju civilnog društva (CPCD), Центар за истражување и креирање политики (ЦИКП) и Институт за демократија и медијација (ИДМ), а финансиски е поддржан од Министерството за надворешни работи на Кралството Норвешка.
