Се садеше во Нова Битола

0
1626
SONY DSC

Општина Битола заедно со ЈП Комуналец денеска го почна проектот „За зелена Битола“. Денес се засадија зимзелени дрвја кај паркот во близина на ОУ Климент Охридски. Со проектот предвидено е засадување на 3000 стебла садници,од кои 2500  се зимзелени дрвја а 500 листопадни, со што ќе се збогати зелениот фонд во општината, а истовремено се преземаат и конкретни мерки против загадувањето.

-Особено се радувам затоа што доаѓаме во дел на градот, каде што очигледно е видливо дека имало недостиг на дрвја и на садници. Започнуваме со динамика која во следниот период ќе се реализира на неделна основа. Мапирани се позициите, но она што особено ме радува е што деновиве доаѓаат наплив на барања од граѓаните на воочени локации од нивна страна, што покажува дека оваа е акција што ја спроведува Општина Битола, заедно со граѓаните, а во интерес на сите нас: Да имаме позелена и почиста Битола, рече градоначалничката на Општина Битола, м-р Наташа Петровска, нагласувајќи дека секоја садница повеќе е благодет и придонесува за прочистување на воздухот, поубава и почиста Битола.

Засадувањето на садниците ќе се реализира според проектно утврдената динамика, односно во зимско – пролетниот и есенско – зимскиот период, додека одржувањето ќе биде континуирано.

-Ова е еден голем проект со кој почнуваме денес. 25 зимзелени и 5 листопадни дрвја веќе се посадени. Истовремено, стоиме на располагање на сите граѓани, со свои идеи да придонесат за наша помош за зазеленување и на други површини. Нашите вработени и за постоечките и за новите паркови, ќе бидат задолжени со редовно одржување, чистење и наводнување. Од друга страна, бараме и од граѓаните да бидат наши помагачи во одржувањето и наводнувањето на овие површини, рече директорот на ЈП Комуналец, Панде Богоевски.

Хортикултурно ќе се уредува и просторот пред училиштето Климент Охридски и спротивната локација пред зградите во Нова Битола. Финансиската конструкција на проектот е обезбедена од АД ЕЛЕМ – Скопје, Подружница РЕК Битола. ЈП Комуналец има ценовник за садниците.