Се урна целиот покрив на Нотр Дам! (ВИДЕО)

Google+ Pinterest LinkedIn Tumblr +

Целиот покрив на легендарната катедрала Нотр Дам се урна во екот на жестокиот пожар во Париз. Кратко пред да падне покривот, пламените го голтнаа и врвот на катедралата.Силен пожар изби попладнево во срцето на францускиот главен град, кој брзо ја зафати оваа зграда од 13 век. Катедралата беше подложена на поправки, па нејзиниот покрив и врвот беа обвиени со скеле.

Како што покажуваат снимките од местото, како и информациите од очевидци, покривот на историската зграда целосно се распадна. Делови од скелето сè уште стојат, додека од внатрешноста на зградата излегуваат силни пламени.

„Дел од нас гори“, напиша францускиот претседател Емануел Макрон на Твитер.

Францускиот претседател Емануел Макрон им изрази сочувство на сите католици и на сите граѓани на Франција додека „дел од нас гори“.

„Нашата Дама од Париз е во пламен“, објави тој вечерва на Твитер. „Моите мисли се со сите католици и сите Французи. Како и сите наши сонародници, тажен сум вечерва додека гледам како овој дел од нас гори.“

Командантот на полициските и пожарникарските сили изјави дека пожарот долго ќе гори. Портпаролот на катедралата потврди дека „целата структура гори“. – Се е во пламен, изјави портпаролот Андре Фино.

„Избувна пожар во Нотр Дам”, објави париската полиција на Твитер. „Избегнувајте го тој простор и ослободете го патот за возилата на противпожарната служба и Итната помош да можат да интервенираат“, се наведува во објавата на Твитер.

Градоначалничката на Париз Ан Идалго изјави дека противпожарните бригади се обидуваат да го стават под контрола огнот.

„Ужасен пожар е во тек во катедралата Нотр Дам во Париз. Пожарникарите се обидуваат да го стават под контрола огнот. На локално ниво сме мобилизирани и во постојан контакт со црковните власти. Барам сите да го почитуваат безбедносниот периметар”, напиша таа на Твитер.

 

mkd.mk и fokus.mk

Share.