Со концертот на унгарскиот виолинист Антал Залаи и камерниот оркестар на Битола заврши јубилејниот Интерфест

Со концертот на битолскиот камерен оркестар и гостинот од Унгарија Антал Залаи, а под диригентство на Ендер Сакпинар од Турција, заврши јубилејното 30. издание на Интернационалниот фестивал на класична музика „Интерфест”.

Виолинистот Залаи е еден од десетте најдобри виолинисти на светот. Започнал да изучува виолина на 5 годишна возраст. Дипломирал на Кралскиот конзерваториум во Брисел во 2009 година.

Беспрекорната техника, музичката виртуозност и зрелост во интерпретацијата на унгарскиот виолинист, се карактеристиките ценети од страна на врвните професионалци .

Освоил над 15 награди на престижни меѓународни натпревари, настапил во 34 земји и снимил 11 албуми од кои посебно се издвојуваат сонатите од Џорџ Енеску, композициите за виолина од Бела Барток како и оние на Паганини.

Со повеќе од милион прегледи на YouTube, Антал Залаи е еден и од најгледаните виолинисти на интернет, со што се стекна со репутација на еден од виолинистите кои се на исто ниво со големите изведувачи од минатото.

Тој свири на виолина од 1773 година. Како дел од Интерфест беше и во 2014 тата година кога одржа солистички концерт.

На програмата на Интерфест беа изведени дела од Холст, Григ, Менделсон, Сен-Санс и Сарастате.

„Интерфест-Битола” годинава беше организиран во чест на 100-годишнината од раѓањето на македонскиот поет и лингвист Блаже Конески.

 

Неда Маретиќ

Сподели