Во гужва на фудбалски натпревар во западноафриканската земја Гвинеја загинаа најмалку 56 луѓе, а многу други се повредени, соопштија властите вчера, известува CNN.
Министерот за информации, Фана Сума, потврдил дека се спроведуваат истраги за да се утврди причината за трагедијата.
Социјалните медиуми беа преплавени со снимки на кои се гледаат фанови кои панично се обидуваат да избегаат од преполнениот стадион. Според изјавите на премиерот Ба Оури, настанот ја засенил фудбалската средба меѓу тимовите Лабе и Нзерекоре.
„Владата изразува жалење поради инцидентите и ја следи ситуацијата, повторно апелирајќи за смиреност за да не се попречи работа на болниците и здравствените услуги,“ изјавил Оури. Иако изјавата не вклучуваше детали за она што се случило во самиот стадион, набрзо беше објавено дека следи подетален извештај.
Сведоци на настанот изјавиле дека хаосот започнал по исклучувањето на еден играч, што довело до револт и фрлање камења кон судијата. Полицијата се вмешала со солзавец, но паниката и нередите продолжиле, што довело до трагични последици. „Луѓето паѓаа на земја, деца и жени беа прегазени. Тоа беше страшно,“ изјавил сведок за медиумите.
Поранешниот лидер Алфа Конде го критикуваше организирањето на натпреварот во време на политички тензии во земјата. Тој истакнал дека земјата е во состојба на ограничувања и дека неопходно е да се истражи како е планиран и организиран овој настан.
Според локалните извори, натпреварот бил дел од турнир организиран од воената хунта на Гвинеја, која ја презела власта по воениот удар во 2021 година. Со тоа се зајакнува загриженоста за политичката нестабилност во регионот, кој по 2020 година доживеа повеќе успешни воени удари.
Во Западна и Централна Африка се регистрирани најмалку осум воени удари, што ја зголемува загриженоста за можен пад кон воена власт во оваа ресурсно богата, но сиромашна област.
