Британците гласаат за новиот парламентарен состав

0
183

Предвремените парламентарни избори во Британија треба да решат кој ќе ја води земјата низ преговорите за Брегзит и дали ќе се одржи уште еден референдум во Шкотска за независност од Обединетото кралство.

Избирачките места се отворени од 7 часот по локално време, а до 22 часот, гласачите ќе бираат меѓу 3.303 кандидати за 650 изборни кругови во земјата, онолку колку што има и места во Долниот дом на парламентот. За апсолутно мнозинство се потребни 326 претставници.

Право на глас имаат полнолетните Британци, државјаните на Република Ирска и земјите на Комонвелтот, како и Британците и Ирците од Северна Ирска кои живеат во странство, а се регистрирани на избирачкиот список во Британија во последните 15 години.

Во трка се Конзервативците од десниот центар на чело со премиерката Тереза Меј и левичарите од Партијата на лабуристите предводени од Џереми Корбин. По нив следуваат и Либерално-демократската партија на левиот центар, популистичката и евроскептична Партија за независност на Обединетото Кралство, и Зелената партија.

На претходните избори во 2015-та година, местата во парламентот беа заземени и од Шкотската национална партија, Велшката националистичка партија „Плаид Камри“ и четири партии од Северна Ирска.

Анкетите покажуваат дека конзервативците се во предност, но можно е и лабуристите да формираат влада со поддршка од помалите левичарски партии.