Еколошката катастрофа во Преспа го привлече вниманието на светски фото конкурс „Уметност за климатска правда“ на кој учествуваат фотографии од повеќе држави.
Татко и син се движат покрај повлечениот брег на Преспанското Езеро, подготвувајќи се за риболов. Огромната каллива површина околу нив е визуелен доказ за климатската криза, додека нивото на водата опаѓа.
Авторка на фотографијата е новинарката Емилија Петреска која е финалист во фото натпреварот кој во фокусот ги става климатските промени.
„Многу често слушам дека Преспанското Езеро исчезнува пред нашите очи и тоа неодамна лично и го посведочив. Таа поразителна слика и чувство на немоќ како поединец едноставно не те остава мирен. И како и секој во денешно време направив неколку фотографии што решив да ги споделам. Фото-конкурсот беше обид овие сцени да допрат до поширока јавност. Идејата беше да се прикаже како климатските промени ни ги обликуваат животите. Јас се фокусирав на прашањето – кој го носи товарот на климатските промени? А, она што сакав да го прикажам е дека токму идните генерации се оние кои најмногу ќе патат од мерките кои се уште не ги преземаме како држава.“-вели новинарката Петреска.
Композицијата намерно го врамува младиот човек. Неговата фигура, опкружена со обемот на еколошки загуби, станува централна точка на фотографијата. Тој не е само сведок на промената, туку и симболично ја носи нејзината тежина. Оваа фотографија служи како потсетник дека последиците од климатската криза директно ги наследуваат младите генерации.
