Денеска во Битола се одржа Јавна расправа по Студијата за оцена на влијание врз животната средина на Проектот „Изградба на државен пат А3,делница Битола-Меџитлија“.Со проектот се предвидува изградба на нов експресен пат Битола-граничен премин Меџитлија со вкупна должина од околу 22,15 км. Надлежен орган за одобрување на проектот е Министерството за животна средина,а инвеститор на проектот е ЈП за Државни патишта.
„Проектот е од јавен интерес и е дел од државната патна мрежа,насловен како А3, меѓутоа оваа делница е исклучително значајна и важна затоа што е дел и од Европскиот коридор 10 Д којшто е врска со коридорот 10 низ Вардарската долина, понатаму гранката 10 Д кон Пелагониската котлина и се поврзува кон Р.Грција“, рече Јоже Јовановски, раководител на Одделението за заштита на животна средина и социјални аспекти при ЈП за Државни патишта.
На јавната расправа присутни беа и проектантите од Градежниот институт „Македонија“ и експерти од животната средина. Студијата е изработена врз база на посети на терен,на искуствата и на база на основите кои што ги дава Законот за животна средина.
„Разгледувани се 12 варјанти, од аспект на тоа како ќе влијае врз животната средина, од економски и социјален аспект, од сообраќаен аспект и од аспект на важноста на патот со поврзување со Коридорот 10 Д, какао и ваше сообраќајно вмрежување со меѓународната сообраќајна мрежа“, рече експертот Љупчо Аврамовски.
Проектот е во финална фаза, после презентацијата на Студијата присутните имаа можност да дадат забелешки и сугестии со цел истиот да се финализира, а ЈП за Државни патишта и Владата да отпочне постапка за изнаоѓање на средства за изградба на овај патен правец.
