За една третина се намалува цената на услугата за интернет кога граѓаните од земјата ќе патуваат во европските земји, соопшти Министерството за информатичко општество и администрација (МИОА).
Намалување на цените на интернет во роаминг е исполнување на Декларацијата за роаминг потпишана на Самитот ЕУ- Западен Балкан, што се одржа во декември минатата година, во Тирана.
Лани на Самиотот 38 телекомуникациски оператори во ЕУ и Западен Балкан потпишаа декларација за сообразност, за значително намалување на јазот помеѓу роаминг тарифите и домашните цени меѓу ЕУ и земјите од Балканот.
Операторите самите одлучуваат како ќе ги намалат трошоците, дали преку попусти, нови тарифи или специјални пакети. Намалувањето е добро за економијата, за бизнисите и за луѓето, и со тоа регионот се приближува до ЕУ.
Исто така, со намалувањето на цените се поттикнуваат и поедноставуваат деловните, културните, туристичките и другите размени помеѓу ЕУ и Западен Балкан, пишува Фокус.
Според МИОА, исполнувањето на оваа Декларација е и уште една поддршка од ЕУ, но и силна потврда за европска иднина на земјата, и интензивната соработка на земјите од Западен Балкан со земјите од ЕУ.
