„Случајно или не, на територија на вашата општина во моментов е најголемиот извор на криминал во Македонија, РЕК Битола и случајно или не токму од таму доаѓа крими финансирањето на кампањата на Стево Пендаровски”, изјави потпретседателот на ВМРО-ДПМНЕ Александар Николоски на митингот на ВМРО-ДПМНЕ во Општина Новаци.
Потпретседателот Николоски истакна дека Стево Пендаровски никогаш ја нема посетено општина Новаци освен во избори.
Потпретседателот Николоски ги повика граѓаните на 24 април и 8 мај масовно да излезат и да гласаат за Гордана Силјановска Давкова.
„Таков човек треба да си замине во историја и затоа ве повикувам на 24 април и 8 мај масовно да излезете на гласање, да ги повикате сите што ги познавате да излезат и во масовна референдумска излезност да ставиме точка, да ги направиме промените, да ја избереме Гордана Силјановска Давкова за претседател, а Христијан Мицкоски за премиер на Македонија”, кажа Николоски.
Потпретседателот Николоски во однос на неговиот противкандидат Венко Филипче истакна дека тој се уште не дошол да ги посети жителите на Новаци и додаде:
„Она кое што го слушам и гледам дава одговор на тоа дека Македонија од оваа положба која што денеска се наоѓа опљачкана, засрамена, понижена, граѓаните насекаде сакаат да ја видат повторна горда. За да Македонија биде повторно горда и за да Македонија биде повторна ваша најпрво е потребно, огромна победа на 24 април на идниот претседател, професорката Гордана Силјановска Давкова. А потоа да не биде Македонија само горда бидејќи и потребно да биде и твоја, а за тоа да се случи ни е потребна историска двојна победа на 8 мај“, порача претседателот на ВМРО-ДПМНЕ, Христијан Мицкоски на митингот во општина Новаци во рамките на претседателската кампања.
Претседателот Мицкоски истакна дека најпрво е потребно да се врати Македонија на тие на кои што им припаѓа, а тоа е народот.
„Најпрвин е потребно да си ја вратиме државата на тие на кои што им припаѓа, а тоа е народот. Народот е единствен суверен во Македонија. За да се случи победа на ВМРО-ДПМНЕ таа треба да биде изразена со мнозинство на пратеници во македонскиот парламент, таа победа треба да биде победа со која ќе се овозможат сите услови да се случи трансформација на Македонија. Тоа е она кое што и е потребно на Македонија како држава“, рече Мицкоски.
Претседателот Мицкоски кажа дека на овие избори има два концепти, а тоа е концептот на Пендаровски и концептот на ВМРО-ДПМНЕ.
„Изборот е јасен се борат два концепта, едниот избор е концептот кој што го нуди Стево Пендаровски. Позади овој концепт кој што го нуди Стево Пендаровски застанаа Али Ахмети, Артан Груби, Бујар Османи, Зечевиќ, Маричиќ и Ковачевски. И другиот концепт е концептот е концептот кој што го нуди ВМРО-ДПМНЕ и Твоја Македонија. Кога ќе го слушнете Стево Пендаровски како ви вели дека можеби ништо не сработил изминативе 5 години, ама барем не крадел, тогаш сетете се на сите посети на раководството на СДС во овој објект недалеку од овде, каде што се договорени тендери и зделки со цени двојно па и тројно поскапи од пазарните, а дел од таа разлика ваши пари, наши пари, пари на граѓаните завршуваа во приватни џебови, а дел имаат за цел да ја финансираат криминалната кампања на Стево Пендаровски“, потсети претседателот Мицкоски.
На крај претседателот Мицкоски порача дека по двојната победа на 8 мај ќе се направи проверка колку Пендаровски и тие околу него се огрешиле пред законот.
