„Kуќа имам на Пелистер“ по вторпат ги привлече Битолчани на Пелистер. Пред Инфоцентарот се запознаа со многу локални производители на храна и пијалоци, а организаторот, НП Пелистер се потруди сите да се чувствуваат добредојдено.
Пола Битола вчера беше на Пелистер.
Второто издание на манифестацијата „Куќа имам на Пелистер“ што е во организација на Националниот Парк „Пелистер“ги однесе жителите на градов на чист воздух, настрана од загадениот воздух и маглата којашто ја налегна Битола. Организаторот имаше и автобуси за превоз на заинтересираните, а најголем број се одвезоа со сопствените возила. Пред часот назначен за почеток на предновогодишниот базар на оваа национална установа почнаа посетителите да се шетаат нагоре и надолу – до мала и голема ливада, Бегова чешма, но најмногу се задржаа токму на предвиденото место – пред Инфо центарот.
Годинава освен битолчани, гости и посетители беа и љубители на планината и од Скопје, Охрид, Велес, Прилеп…истакна директорот на ЈУНП „Пелистер“- Битола, Иванчо Тошевски за медиумите. Ова е настан чија основна цел е да ја обедини и промовира севкупната туристичка понуда на поширокиот регион на едно место.
„Куќа имам на Пелистер“ 2025та за 2026 ќе се памети по најавените 30 учесници – локални угостители, производители на храна и пијалоци и луѓе / правни лица кои се директно вклучени во туристичката понуда поврзана со планината, градот и алтернативна туристичка понуда.
За доброто расположение на присутните со музика и забава се погрижија ДЏ Свадба, Фанк Ап и актерот Никола Пројчевски.
Денеска, ден потоа, организаторот информираше дека додека броеле изброиле 2,500 посетители . Нивниот заклучок е дека манифестацијата има нагорен тренд , особено во делот на вмрежување на угостителите со локалните производители на храна.
