Во процесот на Праведна транзиција, бизнис секторот игра голема улога. Низ европските примери, може да се забележи дека во земјите во кои веќе се спроведува овој процес, бизнис секторот и компаниите имаат носечки товар во менувањето на навиките и создавањето на зелени работни места.
Поради природната географска близина на двата погранични региони, Регионалната стопанската комора од Битола има тесна соработка со Трговската и индустриска комора на Флорина. За двата региони, и за двете регионални комори, предизвик е да се работи на зелена економија и овозможување на зелени работни места.
Во соседна Грција, која е чекор понапред во спроведувањето на Процесот на праведна транзиција, максимално е вклучен бизнис секторот. Тој не само што соработува со министерствата, владата, локалните самоуправи, туку има исто така соработка и со научната заедница, во повеќе области. Тука се обуките, преквалификациите, а формирана е и Зона на иновации.
Многу важна компонента за развој на економијата во општина Битола е вмрежувањето, поврзувањето и соработката со Регионалната стопанска комора со седиште во Битола и со Универзитетот „Св. Климент Охридски“, со цел да се вмрежуваат искуствата за преквалификација и доквалификација и кариерно советување на лицата кои бараат работа, како и да се разгледа можноста за поттикнување на отворање на зелени работни места кои ќе опфаќаат енергетска ефикасност, обновливи извори на енергија, а со тоа и заштита на животна средина. Регионалната стопанска комора, планира да опфати околу 200 фирми со обуки за зелени вработувања и енергетска ефикасност, како и пристап до финансии од оваа област.
Проектот „Подобрување на енергетска безбедност на Пелагонискиот регион преку процесот на Праведна транзиција – состојба на ресурси, искуства со Република Грција и споредба на националните стратегии“ е развиен со поддршка на регионалниот проект СМАРТ Балкан – Граѓанско општество за поврзан Западен Балкан имплементиран од Centar za promociju civilnog društva (CPCD), Центар за истражување и креирање политики (ЦИКП) и Институт за демократија и медијација (ИДМ), а финансиски е поддржан од Министерството за надворешни работи на Кралството Норвешка.