Турција е подготвена да биде домаќин на преговорите за прекин на огнот и траен мир меѓу Русија и Украина, му рекол во телефонски разговор турскиот претседател Реџеп Таип Ердоган на својот француски колега Емануел Макрон, соопшти кабинетот на Ердоган.
Тој изјави дека е постигната историска пресвртница на патот кон завршување на војната меѓу Русија и Украина, дека оваа можност треба да се искористи и дека Турција е подготвена да даде секаков придонес, вклучително и организирање преговори, со цел да се обезбеди прекин на огнот и траен мир, се вели во соопштението од кабинетот на турскиот претседател.
Ердоган и Макрон разговарале и за билатералните односи на двете земји, како и за голем број регионални и глобални прашања, се наведува во соопштението, пренесува Си-Ен-Ен Турк.
Портпаролката на руското Министерство за надворешни работи, Марија Захарова изјави дека Москва очекува одговор во врска со предлогот на рускиот претседател Владимир Путин за продолжување на преговорите со украинската страна во Истанбул.
„Да почекаме реакција од тие, на кои им беа предложени преговори“, истакна Захарова.
На прес-конференцијата во Кремљ синоќа Путин му предложи на Киев да ги продолжи без предуслови прекинатите преговори, кои завршија на крајот од 2022 година.
Се предлага дијалогот да почне на 15 мај во Истанбул.
Според портпаролот на Кремљ, Дмитриј Песков, предлогот на рускиот претседател за директни преговори со властите во Киев ја потврдува вистинската намера за наоѓање мирно решение. За ова прашање, се изјасни и советникот на Путин, Јуриј Ушаков, кој за телевизијата „Прв канал“, рече дека за време на преговорите со Украина во Истанбул треба да се земе предвид реалната ситуација и тоа што е постигнато во преговорите во 2022 година.
МИА
