ЈАНЕВ: БЕЗБЕДНОСТА НЕ Е САМО ЗАДАЧА, ТУКУ ЗАЕДНИЧКА ОДГОВОРНОСТ

Караванот „До вас, за вас“ на Бирото за јавна безбедност денеска беше во Битола. Целта е едукативни интерактивни активности за граѓаните на тема превенција на криминалот, како и грижа на заедницата.

На плоштадот „Гоце Делчев“ поставена беше дел од опремата и средствата со кои располага македонската полиција.

На настанот дојде директорот на Бирото за јавна безбедност, Александар Јанев, придружуван од началникот на СВР Битола, Сашо Мирчески, градоначалникот на Битола, Тони Коњановски и неговиот заменик Бојан Бојкоски.

За овој караван, директорот Јанев кажа дека безбедноста не е само задача, туку заедничка одговорност.

„Ги претставивме дел од средствата и опремата со кои располага македонската полиција. Но, уште поважно, ги претставивме луѓето зад униформите, нашите тивки херои, чесни, посветени и секогаш будни“ рече Јанев.

Изрази благодарност до присутните, до сите што придонесоа да имаат успешен настан, до граѓаните, до неговите колеги и до локалната самоуправа за поддршката.

„Продолжуваме во служба на народот. Македонија има полиција што гледа, што слуша и што чекори блиску до секој граѓанин“, истакна директорот на Бирото за јавна безбедност.

Градоначаникот на Битола, Тони Коњановски кажа дека безбедноста е заедничка одговорност и затоа вакците настани се важни за да се изгради посигурна и посилна заедница.