Државната изборна комисија (ДИК) ги објави првичните неофицијални резултати од денешните повторени локални избори во четири општини во Северна Македонија – Гостивар, Врапчиште, Маврово-Ростуше и Центар Жупа.
Во општина Врапчиште запишани се 27 279 избирачи во Избирачкиот список, а се гласаше на ласаше на 39 избирачки места. Досега податоци се пристигнати од 38 избирачки места, што претставува 97,44 отсто. Вкупно гласале 8 622 гласачи, односно 32,37 отсто. За кандидатот на Национална алијанса за интеграција (НАИ) Исен Шабани добиени се вкупно 5 355 гласа, а за Зулхајрат Демири од Група избирачи 3 028 гласа, истакна на прес-конференцијата портпаролката на ДИК Радица Тодоровска Алексовска.
Во Гостивар, како што информираше Тодоровска Алексовска, се гласало на 121 избирачко место. Излезноста изнесува 30,34 отсто, односно гласале 23 637 гласачи. За кандидатот Невзат Бејта од Коалицијата ВЛЕН добиени се вкупно 7 174 гласови, додека за кандидатот од НАИ, Ваљбон Лимани 14 519 гласови.
Во Маврово Ростуше вкупниот број на избирачки места е 39, а во Избирачкиот список се запишани 10 575 избирачи. Бројот на избирачки места од каде пристигнале податоците во ДИК е 34, додека процентот на избирачки места од каде пристигнале податоците е 87,18 проценти. На ниво на општина гласале вкупно гласале 2 918 гласачи, односно 28,51 процент, рече Тодоровска Алексовска.
Кандидатот Онер Јакуповски од Коалицијата предводена од ВМРО-ДПМНЕ добил 1 906 гласа, а за кандидатот Анес Ахмети од Колицијата предводена од СДСМ 938 гласови.
Во Центар Жупа се гласаше на 16 избирачки места, односно податоци се пристигнати од 100 отсто од избирачките места. Во Избирачкиот список се запишани 7 562 избирачи, а гласале 1 003 гласачи, што претставува излезност од 13,26 отсто. За кандидатот од Демокатската партија на Турците во Македонија, Аријан Ибраим добиени се 973 гласа.
Финалните и официјални резултати ќе бидат објавени откако ќе заврши целосното пребројување.
Повторените избори се одржаа бидејќи на претходниот изборен ден не беше постигната законски определената минимална излезност за да бидат валидни резултатите. За разлика од првиот круг, во повторените избори не важи минимален праг на излезност, туку кандидат ќе биде избран ако добие повеќе од половина од гласовите на оние што гласаат.
ДИК објави првични неофицијални резултати од гласањето во четири општини
