Следната недела ќе се знаат идните чекори во врска со регистрацијата на бугарското здружение „ Иван (Ванчо) Михајлов“ и отворањето на културниот центар со тоа име во Битола, рече денеска премиерот Димитар Ковачевски.
Според него, настанот на отворање на овој центар во саботата претставува, како што рече, ништо повеќе од провокација, бидејќи ги буди духовите од минатото, со оглед на тоа што се работи за личност која била соработник и на Германија на Хитлер и Италија на Мусолини, но и НДХ на Павелиќ.
Ковачевски смета дека со соседните држави треба да се градат мостови на пријателство и да се гледа кон иднината.
Со Бугарија, потенцира премиерот, решението треба да се бара и да се базира врз основа на европските вредности, на задржување на достоинството на граѓаните на двете држави, на нивна заемна почит, но и почит помеѓу политичарите.
