Од денеска едно евро вреди колку еден долар, а тоа значи дека вредноста на еврото е пониска за 12 отсто во однос на доларот од почетокот на 2022 година.
Ова е прво изедначување на валутите по 2002 година и тоа е загрижувачки знак за здравјето на глобалната економија.
Ова е најслабата вредност на европската валута во изминатите 20 години, а тоа е одраз на претпазливоста за ситуацијата во еврозоната, бидејќи Европа е многу повеќе погодена од тешкотиите во снабдувањето со енергија отколку САД. И покрај значителните поскапувања, Европската централна банка (ЕЦБ) заостанува зад мерките на другите земји, па референтната каматна стапка не ја подигна само американската ФЕД, туку и Британија или Швајцарија. Затоа вредноста на еврото со недели паѓа, не само во однос на американскиот долар, туку и во однос на кинескиот јуан и другите валути.
Според некои економисти, пониската вредност на еврото не мора да биде недостаток, односно стоките произведени во еврозоната се поевтини на светскиот пазар, што дури може да биде корисно за земја извозник како Германија, но проблемот е што енергијата и повеќето суровини на светскиот пазар се пресметуваат во долари. Поради политиката на Федералните резерви на САД, но и од други причини, се чини дека инвеститорите и шпекулантите имаат поголема доверба во американските хартии од вредност и затоа им се потребни долари. Финансиските пазари најмногу ги мачи неизвесноста, особено кога е во прашање испораката на руски гас на европскиот пазар.
Иако вестите се позитивни за Американците кои работат и патуваат во Европа, тоа е загрижувачки знак за здравјето на глобалната економија.
Еврото е значително ослабено од европската енергетска криза поради војната во Украина. Русија обезбедуваше речиси 40 отсто од европскиот гас пред војната со Украина, а блокот сега се обидува да ја намали зависноста од руските енергетски извори.
Паритет меѓу еврото и доларот доаѓа во време кога Русија го затвори клучниот гасовод – Северен тек 1 – кој носи гас до Германија. Гасоводот е затворен поради годишно одржување.
Во меѓувреме, доларот зајакна бидејќи инвеститорите бегаат кон валутата како безбедно засолниште, додека Федералните резерви се обидуваат да ги зголемат каматните стапки со најбрзо темпо од 1994 година за да ја зауздаат жешката инфлација.
И додека во САД се создаваат стравови од рецесија, експертите веруваат дека шансите за економски пад во Европа се многу поголеми.
