Ресенчанката Бетика на карневалот во Вевчани настапи како Огнената Кралица. Таа беше вистинска атракција на карневалот кој заврши со традиционалното палење на маските. Вевчанци симболично го истераа злото и ја прочистија новата година. Вевчанскиот карневал е стар околу 15 века.
Ресенчанката Бетика Бети Котовчевска на карневалот настапи 15-та година по ред.
„Петнаесет години василичарка. Петнаесет зими, кругови, молитви и огнови. Со оган го затворам 15-тиот круг. Не како крај, туку како печат. Оган што не пали, туку чисти.
Оган што ги гори старите кожи, тишините, товарите што не биле мои. Со исправен грб и мирна душа. Сè што било тешко, го фрлив во пламенот. Сè што било лажно, се претвора во пепел. Овој оган е чистилиште. За мене. За родот. За патот што продолжува. Од пепелта излегувам полесна, побистра, посвета. Петнаесеттиот круг е затворен. Благословот останува.А јас чекорам понатаму со светлина во очите и оган што ме чува“-порача таа.
Фотографии: Маја Аркагиева
