Припадниците на специјалните единици на српската полиција вчера уапсија тројца вооружени косовски специјалци на територијата на централна Србија, јави дописникот на МИА од Белград.
Во соопштението на Министерството за внатрешни работи, се наведува дека припадниците на Антитерористичката група на специјалната полициска единица лоцирале и уапсиле тројца припадници на косовската полиција Р.З., Б.С. и М.Ш. во административната зона кон Косово и Метохија, далеку во длабочината на територијата на централна Србија.
Сите тројца уапсени биле вооружени со автоматско оружје и во целосна воена опрема со ГПС уреди, мапи и друга опрема.
Како што се наведува, „ успешно е спречен обид на косовската полиција да изврши упад на територијата на централна Србија и да спроведе акција која по сите параметри е терористички акт со цел дополнителна дестабилизација и ескалација на конфликтот насочен против Република Србија“.
Полицијата во соработка со надлежното обвинителство ќе продолжи со понатамошната работа, се наведува во соопштението.
На фотографиите што беа објавени од МВР се гледаат тројца припадници на косовската полиција кои се уапсени, како и автоматски пушки, опрема за надзор, радио врски, мапи…
Албанскиот сајт „Коха“ наведува дека настанот се случил во близина на административниот премин Јариње.
Советот за безбедност на Косово започна утрово, нешто по осум часот, седница посветена на ситуацијата создадена по вчерашното апсење на тројцата припадници на косовската полиција од страна на српски сили на границата меѓу двете држави, јави дописникот на МИА од Приштина.
Полицијата на Косово објави дека српските сили вчера извршиле „класично киднапирање“ на нејзини припадници, во Лепосавиќ во северно Косово, во област каде што криминални гртупи вршат шверц на стоки од Србија.
Седницата на Советот, што се одржува во Владата на Косово, ја свика и ја води премиерот Албин Курти, а на неа присуствуваат вицепремиерот Бесник Бислими, министерот за внатрешни работи, Џељаљ Свечља, директорт на Агенцијата за контраразузнавање, Петрит Ајети, министерот за одбрана Арменд Мехај, министерката за правда, Албулена Хаџиу и министерот за финансии, Хекуран Мурати.
Задача на Советот за безбедност е да препорача безбедносни политики и стратегии за надлежните органи и институции. иа/
