Силен земјотрес со јачина од 7,8 степени според Рихтеровата скала ја погоди југоисточна Турција и северозападна Сирија рано утринава, при што загинаа повеќе од 600 луѓе, а стотици беа повредени при уривање на згради низ регионот.
Земјотресот се случил во 4:17 часот по локално време на длабочина од 17,9 километри, а уште еден земјотрес со јачина од 6,7 степени следел 15 минути подоцна.
По ова следувале повеќе од дваесетина силни потреси со магнитуди над 4 и 5 степени.
Спасувачките екипи се на терен, а првите снимки покажуваат разурнати згради од кои спасувачите извлекуваат повредени луѓе.
Турција соопшти дека се погодени десет града, додека во Сирија имало многу мртви во регионите Алепо, Латакија, Хомс и Тартус.
Земјотресот, бил почувствуван дури до Каиро, како и во Либан, Кипар и Израел.
Сеизмолозите велат дека најсилниот земјотрес во Турција е регитриран во декември 1939 година, кој исто така имал јачина од 7,8 степени според Рихтерова скала, при што загинале 30.000 луѓе.
