Битола станува град на старо население, а проблемот со иселувањето на младите се чувствува во многу области.
За ваквите загрижувачки состојби алармираат и експертите и велат дека ќе дојде време кога ќе немаме млади луѓе во градот, ќе нема кој да работи, за да се обезбедат пензии за пензионерите.
Ваквата реалност ја наметнува итноста од изградба на домови за згрижување на стари лица во Битола, бидејќи со иселувањето на младите нема кој да се грижи за постарите членови во семејствата.
Ваквиот тренд на иселување на младите е голем проблем и за битолските основни и средни училишта.
„На ниво на Битола намален е бројот на ученици коишто се запишуваат во прво одделение. Факт е дека голем број на млади брачни парови со своите деца ја напуштаат државата од многу причини. Секоја година како што се намалува бројот на првачињата, тоа ќе биде сериозна закана и за наставниците, бидејќи намалување на паралелки, намалување на фонд на часови, можеме да останеме без наставници кои би ја работеле својата работа“, вели за ТЕРА телевизија директорот на ОУ „Стив Наумов“ Никола Пискачев.
Инаку, алармантна демографија и негативен природен прираст во Пелагонискиот Регион покажаа и податоците на Државниот завод за статистика.
