Преспанското село Љубојно изминатиов викенд беше вистинскиот центар на македонската традиција, автентичните вкусови и староградската песна. Во саботата, на 18 јули, со почеток од 17:00 часот, се одржа новото издание на традиционалниот продажен фестивал „Преспанска софра“, кој годинава имаше уште попразничен и емотивен карактер.
Ова издание на манифестацијата, во организација на Месната заедница на с. Љубојно, помина во знак на еден голем јубилеј – 50 години од изградбата на селскиот водовод, настан кој пред половина век го промени животот во ова преубаво преспанско место.
Посетителите кои во голем број пристигнаа во Љубојно, имаа единствена можност да уживаат во сето она што го нуди богатото гастрономско и културно наследство на Преспанскиот Регион.
Плоштадот во селото беше исполнет со шарени штандови кои понудија автентични вкусови. Мирисот на традиционалните народни специјалитети и домашни јадења, подготвени по рецептите на нашите баби, ги мамеше сите присутни. Посетителите дегустираа и купуваа специјалити карактеристични исклучиво за овој крај.
Беа изложени автентични преспански земјоделски производи, но и прекрасни рачни изработки кои сведочат за креативноста и вештите раце на локалното население.
Староградски мелос под отворено небо
Како што доликува на едно вакво празнување, покрај богатата трпеза, присутните уживаа и во врвна културно-уметничка програма. За одличната атмосфера, емоциите и незаборавното доживување под преспанското небо се погрижи групата „Антика“.
Со изведбата на безвременските староградски македонски песни, тие ги разиграа и ги распеаја сите генерации, создавајќи амбиент кој долго ќе се памети.
„Преспанска софра“ уште еднаш докажа дека Љубојно е жив чувар на македонскиот идентитет, корен и традиција. Спојот на добрата храна, традицијата и убавата песна ги сплоти мештаните, иселениците и гостите во една незаборавна преспанска приказна.
Организаторите изразија огромно задоволство од посетеноста и успешноста на настанот, ветувајќи дека и во иднина Љубојно ќе продолжи ширум да ги отвора своите порти за сите вљубеници во македонското изворно културно богатство.
