Во Народниот театар, беа доделени наградите на 25. издание на Интернационалниот фестивал на монодрама во Битола. Секоја вечер салите беа исполнети до последното место. Градот Битола уште еднаш докажа дека е вистински фестивалски град, место на средба на актери кои ја слават монодрамата како модерна театарска форма на “one man show”. Мотото Слободата живее тука, се потврди и се докажа дека моќта на еден човек на сцената е безграничен. Битола пречека талентирани актери од 9 земји кои на различни фестивалски сцени прикажаа 10 извонредни монодрами, оставајќи ги гледачите маѓепсани од моќта на еден изведувач на сцената.
Наградата од публиката, која традиционално ја доделува општина Битола, оваа година му беше доделена на претставата „Сите најубави работи“, со актерот Игор Ангелов, во режија на Дејан Пројковски. Градоначалникот на општина Битола Тони Коњановски му ја додели наградата од публиката на актерот Ангелов, чија претстава од публиката беше испратена со големи овации, исто како и доделувањето на наградата. Во своето обраќање, градоначалникот упати благодарност до организаторите на фестивалот, Центарот за култура, директорката Маја Андоновска Илијевски и до сите годинешни учесници.
Специјалното признание за уникатно театарско искуство отиде во рацете на актерот Абдула Маасуд и неговиот тим од Обединетите Арапски Емирати. Претставата „Букача“ на театарската дружина „Ема“ од Загреб, Хрватска, ја доби наградата за најдобра режија, а за најдобар актер беше прогласена Јулија Кудрјашова од Казахстан, со претставата „Кој го знае едниот“. Гран при наградата отиде во Ереван, Ерменија, кај актерот Арам Хованисјан, за претставата „Дон Кихот“. Овој актер пред 20 години, исто така беше добитник на Гран при наградата за претставата „Ричард Трети“ на Интернационалниот фестивал на монодрама.
На крајот од церемонијата, претставниците од Обединетите Арапски Емирати, му подарија слика на градоначалникот, со значаен историски објект од нивната држава. Во чест на наградените, Драмскиот театар од Скoпје ја изведе претставата „Чудна случка со кучето во ноќта“.
