„Ги гледав бројките за Еразмус, 10 илјади само во 2022 година отишле некаде со новата програма. Претходно 30 илјади за цел период, а сега 10 илајди само во 2022 година“ рече вицепремиерот за европски прашања Бојан Маричиќ на инфо сесијата „ЕУ за младите“.
Тој додаде дека стандардната позиција на денешните млади е подобра отколку за неговата генерација, бидејќи не се потребни визи и полесно може да се патува на размени и на стручно доусовршување.
„Тоа што следува на вашата генерација и за што треба да се бори се повеќе можности и поголеми успеси од тоа што ние сме постигнале“ рече Маричиќ.
Вицепремиерот додаде дека младите денес се борат со светот и не се ништо помалку вредни од други млади луѓе во Европа, а токму програмата Еразмус тоа го покажува.
Маричиќ вели дека македонската младина е европска младина, ја сакаме ЕУ бидејќи ни носи механизми за подобро општество.
„Македонската младина е европска младина. Сме покажале повеќе пати на дело дека знаеме и умееме да бидеме европјани на дело. Ја сакаме ЕУ, не затоа што е некаква бајка или убава приказна, туку затоа што носи механизми како да сме подобро општество, да искористиме повеќе прилики и да учиме бесплатно на најдобрите универзитети во Европа и тоа знаење да го вложиме во нашиот развој и кариера“ рече вицепремиерот.
Тој додаде дека не смееме да се откажеме од нашата европска иднина и ако работиме заедно и за членството во ЕУ ќе бидеме посилни.
„Сите нации, сите држави кои влегоа во ЕУ денес ни се пример и нашите работат таму“ рече Маричиќ.
