Превентивно да се преврива водата за пиење во Крушево, апелираат до граѓаните од Јавното претпријатие „Комуна“.
Оттаму велат дека поради обилните дождови и поплавите по околните села се јавува заматување на водата и на граѓаните на целата Општина Крушево им препорачуваат да ја превриваат водата по најмалку 10 минути пред да се пие.
Од Општината Крушево информираат дека и денеска се санираат штетите од поплавите во Крушево и околината.
„И денес сме работно присутни низ градот. Апелираме до граѓаните да бидат внимателни поради појава на мраз. Екипите на ЈП „Комуна“ активно работат на терен за зголемена безбедност и нормално одвивање на сообраќајот. И денес продолжија теренските активности, при што екипи беа ангажирани и во с. Милошево-информираа од Општина Крушево.
Инаку, според надлежните, Крушево е една од општините што претрпи најголеми штети од поплавите што ја зафатија Македонија.
