Земјоделскиот комбинат „Пелагонија“ од Битола, сопственик на еден од најголемите земјоделски комплекси во земјава, повторно се соочува со можност за отворање стечајна постапка. Овојпат иницијативата до Основниот суд во Битола ја поднела струмичката компанија „Агроефодиа Василево“, која побарувањето го темели на правосилна и извршна судска пресуда.
Станува збор за долг од околу 48 милиони денари, односно приближно 800.000 евра, на кој треба да се додадат каматата и судските трошоци. Во предлогот е побарано и назначување привремен стечаен управител, а судското рочиште е закажано за 5 ноември. Во меѓувреме, останува отворена можноста двете страни да постигнат договор за надминување на спорот.
Според известувањето од стечајниот судија Иван Колевски, „Агроефодиа“ во барањето се повикува на пресуда на Основниот суд во Битола од 25 јануари 2025 година, која била потврдена со одлука на Апелациониот суд од 8 јуни 2026 година.
Причината за барањето за отворање стечајна постапка, како што е наведено во судското известување, е неуспешниот обид долгот да се наплати преку извршител. Иако сметката на ЗК „Пелагонија“ била блокирана, според доставените информации, на неа не бил евидентиран никаков прилив со кој би можело да се подмири побарувањето.
Претходно, во ноември 2024 година, и компанијата „Бетон“ од Штип побара отворање стечајна постапка над земјоделскиот комбинат. Тогаш од ЗК „Пелагонија“ информираа дека долгот е платен и дека со тоа престанале причините за поведување на постапката.
„Агроефодиа“ е компанија од Василево, со седиште во Струмичкиот регион, која се занимава со трговија, увоз и извоз на земјоделски производи и репроматеријали, меѓу кои вештачки ѓубрива, семенски материјал и сточна храна. Според достапните податоци, компанијата остварува годишни приходи од околу 2,5 милиони евра. Нејзин краен сопственик е кипарската компанија „Интерцом Емпорики Лимитед“ од Никозија.
