Руски проектил погоди петкатна станбена зграда во текот на ноќта во градот Криви Рих во украинската област Днепропетровск, при што загинаа најмалку три лица, а беа повредени десетици, соопштија локалните власти на 13 јуни, откако повторно беше прогласена тревога за воздушен напад низ Украина за време на ноќта, пишува Радио Слободна Европа.
„Тројца мртви, 25 ранети – 19 од нив се во болница“, соопшти регионалниот гувернер на Днепропетровск Серхиј Лисак на Телеграм.
„Горат станови од првиот до петтиот кат, кои зафатија 700 квадратни метри. Спасувачите го гаснат пожарот. Најверојатно има луѓе под урнатините“, рече Лисак.
Градоначалникот на Криви Рих, Олександар Вилкул, рече дека руските проектили погодуваат само цивилни и инфраструктурни цели.
„Шестте ракети не погодија ниту една воена цел – [погодија] една станбена зграда, складиште. Во овој момент, имаме тројца мртви, 25 ранети, од кои 10 сериозно и три екстремно сериозно. Уште седум лица се веројатно уште под урнатините“, објави Вилкул на Телеграм.
Претседателот на Украина Володимир Зеленски го осуди нападот, велејќи дека „на терористите никогаш нема да им се прости“.
