Европската Унија дава целосна поддршка на сеопфатниот патоказ предложен од американскиот претседателот Џо Бајден, кој би довел до траен прекин на огнот во Газа, ослободување на сите заложници и доставување на повеќе хуманитарна помош за Газа, порача високиот претставник на ЕУ за надворешна политика и безбедност Жосеп Борел.
„ЕУ ги цени решителните напори на САД, Египет и Катар за олеснување на преговорите за ставање крај на војната меѓу Израел и Хамас, истовремено гарантирајќи ја безбедноста на Израел, на која ЕУ останува целосно посветена“, наведува Борел во писмената изјава.
Францускиот претседател Емануел Макрон денеска го повика палестинското исламистичко движење Хамас, „чија одговорност е огромна“, да го прифати договорот за прекин на огнот предложен од неговиот американски колега Џозеф Бајден, соопшти Елисејската палата.
Вчера израелска делегација отпатува во Каиро за да разговара за нацрт-предлогот за прекин на огнот и размена на заробеници во Појасот Газа, што е под интензивни израелски воени напади од 7 октомври.
За време на разговорите, делегацијата ќе го соопшти ставот на Израел за новата понуда за прекин на огнот и ослободување на затворениците, објави либанскиот весник „Ал-Ахбар“, повикувајќи се на египетски извори.
Изворите тврдат дека договорот би можел да стапи на сила веќе следната недела поради притисокот на САД врз Израел и регионалните дипломатски напори.
