Новиот закон за заштита од пушењето се очекува да стапи на сила во март.
Според информации од здравствените власти се планира забрана не само на класичните туку и на електронските цигари, „вејп” апаратите и други уреди кои содржат никотин во сите угостителски објекти, фирми, јавни институции, автобуски и железнички станици, пазари и јавни места каде има повеќе луѓе.
Не смеат да се пушат цигари ниту во автомобил ако има малолетно дете.
Во рестораните и кафетериите ќе биде дозволено пушење само на терасите ако се отворени од 3 страни, а не како досега застаклени или преградени.
Законот предвидува и забрана за увоз и продажба на тутунски и никотински производи со вкусови и ароми.
Дополнително, се забранува видно изложување, промовирање и рекламирање на цигари и уреди преку маркети, телевизии, социјални мрежи и јавни настани.
Целта на законот е намалување на изложеноста на чад и аеросоли и спречување на нови генерации зависници.
„Предлог-законот прво ќе биде објавен на ЕНЕР, за потоа да следи фаза на јавна расправа. По завршување на консултациите и вградување на релевантните забелешки, текстот ќе се финализира и ќе се достави во владина процедура. Предложените законски решенија се очекува да придонесат за намалување на ризикот од болести поврзани со тутун и никотин, да се поддржи откажувањето од зависност и да се постави систем кој ќе води грижа за здравјето на граѓаните согласно европските стандарди и меѓународните обврски на државата“- објаснуваат од Министерството за здравство.
