„Безбеден град“ носи промена, односно веќе има новитети при регистрацијата на возила.
Министерството за внатрешни работи воведува нова процедура при регистрација на возилата, со цел да се намалат можните грешки при доставување известувања и санкции од системот „Безбеден град“.
Сопствениците на возила, при регистрација во станиците за технички преглед или во управните служби, ќе треба да остават мобилен телефонски број и електронска адреса. Потоа, на двата контакти ќе добијат порака со код за верификација.
Со внесување на кодот ќе се потврдува дека телефонскиот број и меил адресата навистина му припаѓаат на сопственикот на возилото. Според МВР, оваа измена треба да обезбеди поголема точност при испраќање на известувањата.
Санкциите од „Безбеден град“ и понатаму ќе се доставуваат преку СМС порака и електронска пошта, но со новата проверка ќе се избегнат ситуации во кои казните би биле испратени на погрешен број или меил.
Новитетот е дел од напорите за поуредна комуникација меѓу институциите и граѓаните, особено во делот на сообраќајните прекршоци и автоматизираното известување.
