Проблемот со уличните кучиња низ македонските градови и патишта добива нова, технолошка димензија на решавање. Поради сè почестите непријатни ситуации и опасности на терен, велосипедската заедница во земјава започна иницијатива за меѓусебна заштита.
Преку платформата „Travelers Cycling / Травелерс Велосипедизам“, активистите и љубителите на две тркала започнаа со креирање на специјална интерактивна мапа која има за цел да ги мапира критичните точки каде што се движат глутници или агресивни кучиња.
Идејата зад овој проект е едноставна, но исклучително ефикасна — се заснова на солидарност и споделување информации во реално време. Пред да тргнат на непозната рута, велосипедистите можат да ја проверат мапата за да видат дали на тој правец има пријавени опасности.
„Со оваа функционалност можете однапред да бидете информирани за локации каде што има агресивни или пуштени кучиња, за да ја испланирате рутата побезбедно и да избегнете непријатни ситуации“, појаснуваат од „Travelers Cycling“ во својот повик до јавноста.
Успехот на оваа мапа зависи директно од вклученоста на самите велосипедисти. Затоа, креаторите апелираат до сите кои ќе се соочат со кучиња за време на нивното возење, веднаш да ги пријават следните клучни информации:
-Точната локација на средбата;
-Датумот и времето кога се појавиле кучињата;
-Степенот на опасност: дали кучињата биле пуштени домашни миленици, дали покажале агресија или пак биле мирни.
Секоја нова пријава се внесува во системот, правејќи ја мапата попрецизна и покорисна за целата заедница.
Оваа иницијатива доаѓа како директен одговор на долгогодишниот проблем со бездомните кучиња во Македонија, прашање кое локалните власти со години со мака и со променлив успех се обидуваат да го решат.
Бидејќи велосипедистите се меѓу најранливите категории учесници во сообраќајот кои често се мета на напади, оваа дигитална алатка за нив значи разлика меѓу безбедно рекреирање и потенцијална опасност да бидат нападнати од куче.
Од велосипедската заедница порачуваат: „Возете безбедно и помогнете им и на другите велосипедисти да бидат навреме информирани!“
Заканите од кучиња ги алармираа велосипедистите – ќе се штитат со дигитална мапа
