Со измените на Законот за безбедност на сообраќајот на патиштата, електричните тротинети стануваат превозно средство со строго дефинирани правила. Старосната граница е подигната на 18 години, заштитниот шлем е задолжителен за сите, а полицијата ќе може и привремено да ги одзема возилата.
Новите, значително построги правила за управување со електрични тротинети во земјава и официјално стапија на сила. Со измените на Законот за безбедност на сообраќајот на патиштата, државата става крај на хаосот на улиците и тротоарите, воведувајќи драстични промени кои директно влијаат врз најмладите корисници, но и врз возрасните.
Главната новина која предизвика најголемо внимание во јавноста е целосната забрана за малолетници. Минималната возраст за управување со електричен тротинет се зголемува од досегашните 14 на 18 години.
Законските измени не се донесени случајно. Тие следуваат по деталните сообраќајни анализи за периодот од 2024 година до мај 2026 година, кои откриваат застрашувачки бројки на патиштата.
Во овој двегодишен период, во сообраќајни незгоди учествувале дури 2.352 возачи на мопеди, мотоцикли и електрични тротинети. Билансот е трагичен:
46 лица го загубиле животот.
585 лица се здобиле со тешки телесни повреди.
1.347 лица поминале со полесни повреди.
За да се стави ред во сообраќајот, законодавецот пропиша конкретни правила и ограничувања кои отсега секој возач мора да ги почитува:
Кацигата е задолжителна за сите: Носењето заштитен шлем (кацига) станува задолжително за секој возач, без исклучок.
Брзината останува ограничена: Максималната брзина на велосипедските патеки е ограничена до 20 km/h, додека на тротоарите, пешачките и мешаните патеки возењето е строго ограничено до 6 km/h.
На места каде што нема обележана велосипедска патека, возачот е должен да се симне од тротинетот и да го турка преку коловозот или пешачкиот премин.
Строго E забрането превезување сопатници: На тротинет не смее да се вози повеќе од едно лице. Доколку се прекрши ова правило, казна ќе платат и возачот и сопатникот.
Останува обврската за носење елек во ноќни услови или при намалена видливост.
Оние кои нема да ги почитуваат новите прописи ќе се соочат со високи парични казни, но и со една нова, крајно рестриктивна мерка. За одредени прекршоци, полицијата ќе има овластување привремено да го одземе електричниот тротинет во траење од 30 дена.
Доколку полицијата затекне дете (малолетно лице) како управува со електричен тротинет, законската и прекршочната одговорност ќе ја сносат неговите родители или старатели.
Надлежните очекуваат дека со овие радикални измени значително ќе се намалат ризиците во сообраќајот и конечно ќе се воведе ред на јавните простори во градските средини, каде што бројот на овие возила во изминатите години енормно порасна.
Црните статистики притиснаа за построги правила за возење тротинет
