Вечерва е свеченото затворање на 34-то издание на Интернационалниот фестивал на класична музика „Интерфест“ Битола од 20:00 часот во Офицерскиот дом во Битола.
Рецитал на Џанлука Луизи – пијано, Италија
На програмата се дела од:
Ф. Шопен (1810-1849): Четири Балади
- Балада бр. 1 во g-moll
- Балада бр. 2 во F-dur
- Балада бр. 3 во As-dur
- Балада бр. 4 во f-moll
Ф. Шопен: Скерцо бр. 2 oп. 31
Ф. Шопен: Валцер оп. 64 бр. 2
Ф. Шопен: Полонеза „Ероика“ оп. 53
New York Concert Review:
„Свирењето на Луизи беше извонредно присутно. Тој е силен и имагинативен уметник, одличен пијанист кој заслужува светско признание.“
Nordbayerischer Kurier, Бајројт:
„… една вечер со пијанист од светска класа!“
Џанлука Луизи / Gianluca Luisi се вбројува меѓу најистакнатите италијански пијанисти, високо ценет и од критиката и од публиката. Роден во Пескара, дипломирал со највисоки оценки на Конзерваториумот во Пезаро. Иако своето музичко образование го започнал на шестгодишна возраст, неговиот развој се одвивал постепено и природно, што резултирало со блескави и страсни, но секогаш ненаметливи интерпретации.
Се усовршувал во Имола на Академијата „Incontri col Maestro“ со Франко Скала и Пјеро Раталино, со Алдо Чиколини во Париз и со Серџо Пертикароли во Рим. По настапите во повеќе културни центри ширум Европа, во 2007 година дебитирал во „Carnegie Weill Recital Hall“ во Њујорк пред воодушевена публика.
Добитник е на бројни награди на меѓународни натпревари. Победник е на “IV Concorso Johann Sebastian Bach di Saarbrücken”. Настапувал во Германија, Франција, Велика Британија, Луксембург, Малта, Австрија, Португалија, Швајцарија, САД, Јапонија, Кина и во својата родна Италија.
Настапил во престижни сали како „Auditorium di Milano“, „Purcell Room“ при „Royal Albert Hall“ во Лондон, „Carnegie Hall“ во Њујорк и „Baumann Auditorium“ во Портланд. Бил гостин на реномирани фестивали, меѓу кои Schleswig-Holstein Music Festival, Bachfest Leipzig, European Music Festival Stuttgart, Saar Music Festival и Serate Musicali во Милано.
Особено му е блиска музиката на Јохан Себастијан Бах. Меѓу другото, го изведе целосниот (двата тома) „Добро темпериран клавир“ напамет во две последователни вечери и ја сними оваа програма за Centaur Records, со врвни критики и признанија од меѓународните медиуми.
Има реализирано повеќе од дваесет и шест компакт-дискови за издавачки куќи како Centaur Records, Naxos, Dabringhaus und Grimm mDG, AEVEA Classic, Onclassical и ARTS со: Англиски и Француски суити од Бах, Двата Шопенови концерти за пијано и оркестар, Двата Листови концерти и други дела. Неговите концерти се снимани во живо од водечки европски и американски радија.
Покрај концертната дејност, Луизи предавал на Академијата „Incontri col Maestro“ во Имола, на Музичката академија во Пескара, на Конзерваториумот „Умберто Џордано“ во Фоџа, на Конзерваториумот „Г. Росини“ во Пезаро, како и на Универзитети во САД (Портланд, Невада, Лас Вегас, Њујорк), Јапонија (Нагоја, Јамаха Факултет) и Кина (Шангај).
