Иванчо Тошевски, актуелен директор на Националниот парк Пелистер, е избран за нов член на Секретаријатот на ВМРО-ДПМНЕ.
Информацијата за именувањето ја сподели самиот Тошевски на својот личен Фејсбук профил, при што порача: „Со силна поддршка за Драган Ковачки и со голема благодарност за укажаната доверба и чест да се биде дел од Секретаријатот на ВМРО-ДПМНЕ“.
Изборот следува по конститутивната седница на Секретаријатот одржана синоќа, на 18 ноември 2026 година, со која партијата го заокружи кадровското екипирање на своите оперативни структури. Претходно, Централниот и Извршниот комитет ги поставија клучните раководни фигури во оваа вертикала, при што пратеникот Драган Ковачки беше избран за генерален секретар, Љупчо Пренџов за негов заменик, а Ивица Томовски за организационен секретар.
Секретаријатот на ВМРО-ДПМНЕ претставува главно оперативно и теренско тело на партијата. Неговите ингеренции опфаќаат директна координација со општинските и месните комитети, мобилизација на членството, ажурирање на партиската инфраструктура и спроведување на одлуките на највисоките партиски органи на локално ниво.
Со вклучувањето на Тошевски, покрај тројцата пратеници од Битола, се зајакнува битолското претставништво во тимот на Ковачки. Како долгогодишен партиски кадар, поранешен советник во локалната самоуправа и актуелен директор на НП „Пелистер“, Тошевски со своето искуство треба да даде значаен придонес во теренската координација и функционирањето на ова важно партиско тело. За потсетување, Иванчо Тошевски беше советник во Советот на Општина Битола во мандатот од 2017 до 2021 година. Во тој период тој ја извршуваше и функцијата координатор на советничката група на ВМРО-ДПМНЕ во битолскиот Совет, а во мај 2018 година беше избран и за претседател на Општинскиот комитет на ВМРО-ДПМНЕ во Битола.











