По завршувањето на Меѓународниот ликовен конкурс за изложбата “Битола 2022” Меѓународното стручно жири на “Малиот Битолски Монмартр ги соопшти годинешните резултати. Гран при оди за Турција, а почесната награда “Коста Хаџи-Антоновски“ во Русија.
Меѓународниот ликовен конкурс беше распишан на 10 септември 2021 година а траеше до 20 февруари 2022 година. Пристигнаа пратки од 450 училишта со над 22.500 цртежи од 40 земји од Европа до Азија.
„Овогодинешните резултати за јубилејното 40-то издание на Меѓународниот ликовен конкурс за изложбата “Битола 2022” се секако и најава и основа за одржување на 41-вото издание на “Малиот Битолски Монмартр” кој по пауза поради Пандемијата оваа 2022 година повторно ќе е со посета на детските ликовни амбасадори од цел свет кои низ Битола традиционално ќе творат во периодот од 23-ти до 30-ти мај 2022 година“, најавуваат организаторите.
Стручното жири од вкупниот број пристигнати творби на конкурсот од 20.000 млади ликовни уметници за 40-тата јубилејна Меѓународна изложба на детски ликовни творби “Битола 2022” избра 777 дела, а истата ќе биде отворена на 23.05.2022 година во просториите на Националната детска ликовна галерија “Монмартр” и ќе трае се до крајот на тековната година.
Меѓународното стручно жири ги донесе и следните одлуки: добитник на наградата “Гран – при 2022” е “Atolye Veysel Acar“ – Trabzon – Turkey, а почесната награда “Коста Хаџи-Антоновски” за долгогодишно учество – соработка и придонес – Ирина Кручинина- Children’s Art Studio “Rostok” – Русија. Награда “Проф. Д-р. Богомил Карлаварис” за животно дело – Светлана Вешиќ Ралевиќ – Ликовно ателје Артино, Белград.
Наградите за специјална колекција за училиште одат во Унгарија, Романија и Словенија, а награда за учество на “Малиот Битолски Монмартр 2022“ за 25 екипи кои во периодот од 23 до 30 мај 2022 година ќе престојуваат во Битола со 2 учесници и 1 ликовен педагог.
Неда Маретиќ
