Непостоењето на единствен интегриран систем за издавање упати, нема систем електронски рецепт, неевидентирани аванси за лекувања во странство. Здравствените установи се неодржливи, а здравствените услуги скапи. Ова е само дел од ревизорскиот извештај за работата на Фондот за здравство објавен денеска, ама за во 2022 година.
Денеска објавениот извештај се однесува на ревизијата којашто Државниот завод за ревизија ја спроведувал за работата на Фондот за здравство во 2022 година – ја прегледувале усогласеноста на финансиските извештаи.
Утврдени се слабости во контролните активности на Фондот изразени на неколку начини.
Најпрвин констатирано е непостоењето на единствен интегриран систем за издавање упати, лекарски извештаи и пресметки за извршени здравствени услуги, што се основа за изготвување на месечни фактури а без тоа постои ризик од пропусти и грешки. Не била воспоставена или воопшто немало контрола на вршењето на здравствените услуги во здравствените установи. Тоа ја оневозможило ревизијата за целосно потврдување на фактурите за услугите.
Постои ризик од плаќање на фактури за рецепти во обем различен од реалниот, затоа што во2022 година немало системска контрола во препишувањето и издавањето на лекови. Активности за воспоставување на систем е-Рецепт биле започнати во 2021, ама таков систем нема и во 2022, се вели во извештајот.
Реализацијата на условниот надоместок во јавните здравствени установи нецелосно се следи од Фондот, не се вршени финансиски контроли на наменското трошење на средствата, на набавката и евиденцијата на лековите и на извршените здравствени услуги за 2022 година. Издвоените средства за условен надоместок во 2022 година изнесуваат 1.721.002 илјади денари за 24 јавни здравствени установи и истите бележат континуиран раст.
Во постапката за упатување за лекување во странство на осигурените лица не е обезбедена соодветна правна заштита на барателите и не е воспоставена контрола и систем на следење на успешноста на лекувањето во странство. Побарувањата за дадени аванси за лекување во странство нецелосно се евидентирани и не се воспоставени соодветни контроли за потврдување на фактурите од странските болници.
Ваквата состојба резултирала со тужбени барања од странски болници, за кои постои неизвесност за крајниот исход.
Лани Фондот се соочи со сајбер напад, а тоа меѓу другото било можно и заради неправилностите во набавката на единиците од информацискиот систем. Јавните набавки се правеле без конкуренција, со договор во 4 очи, надвор од законските рокови. Фондот за здравство функционира со застарена серверска структура.
Државниот завод за ревизија кон крајот на извештајот го проблематизира буџетот на Фондот за здравство. Во извештајот стои „не е обезбедено вистинско купување на услуги предвидено со Законот за здравственото осигурување, односно Фондот наместо да ги надоместува извршените здравствени услуги е принуден, во рамки на утврдениот буџет, да обезбеди средства за целосно функционирање на сите јавни здравствени установи. При тоа 2/3 од нив не успеваат да остварат обем на здравствени услуги во висина на договорениот надоместок, поради што имаат статус на неодржливи, што покрај останатото се должи и на неажурираните референтни цени на услугите.“
