Обезбедивме вработувања за 1.117 лица, приоритетен кадар во здравството, создаваме услови за квалитетно и врвно здравство, рече на денешната прес конференција премиерот Димитар Ковачевски.
„Со одлуката на денешната владина седница за вработувања на неопределено време во јавните здравствени установи направивме историски чекор напред за зајакнување на човечкиот капитал и зајакнување на нашите здравствени институции. Го зголемуваме квалитетот на услугите, јавното здравје е наш врвен приоритет. Ќе сториме се што е во наша моќ да ги задржиме кадрите тука и да овозможиме квалитетен живот дома. Инвестициите во здравството се влог во иднината на нашата држава“ рече Ковачевски.
Истакнувајќи дека се скратени процедурите за вработувањата во јавните здравствени установи за да се овозможи полесно и побрзо пополнување на местата во здравството, премиерот Ковачевски потенцираше дека Владата ќе стори сè за да ги задржи кадрите тука. При тоа, премиерот ги посочи постигнувањата на Владата во ресорот здравство, како што се покачувањето на платите, обезбедувањето на неопходните лекови, усовршувањето на здравствените работници и капиталните проекти со кои се подобрени условите во здравството.
„Наш фокус е да создадеме модерно здравство, систем којшто ќе работи за доброто на граѓаните. Последниве неколку години, за прв пат после децении, се реновираа повеќе здравствени капацитети, и имаме скапа опрема за лекување во здравствените установи низ државата, а не само во Скопје. Нашите граѓани, заслужуваат врвно здравство, коешто се унапредува секојдневно и коешто ги зголемува своите капацитети за згрижување за сите граѓани на кои што им е потребна здравствена заштита”, порача премиерот Ковачевски, заблагодарувајќи се на министрите Меџити и Бесими, како и на здравствените работници за нивната посветена работа.
