Американскиот претседател Доналд Трамп изјави дека неговиот украински колега Володимир Зеленски и рускиот претседател Владимир Путин ќе одржат состанок за да се обидат да постигнат прекин на огнот и да ја прекинат војната во Украина.
Трамп на прес конференција по средбата со рускиот шеф на државата Путин нагласи дека имале многу продуктивен состанок.
„Верувам дека имавме многу продуктивен состанок. Имаше многу, многу точки за кои се согласивме… Нема договор додека нема договор. Би рекол неколку големи точки, но сè уште не сме баш таму, постигнавме напредок…. Секако ќе го повикам претседателот Зеленски и ќе му кажам за состанок… Навистина постигнавме голем напредок“, рече Трамп.
Рускиот претседател ја отвори прес-конференцијата по средбата со американскиот претседател Доналд Трамп и нагласи дека разговорите „се одржале во конструктивна атмосфера на меѓусебно почитување“.
„Имавме многу темелни преговори што беа доста корисни“, изјави тој и му се заблагодари на Доналд Трамп за предлагањето на самитот во Алјаска.
Путин вели дека Украина била централна тема во разговореите и го повтори својот став дека конфликтот е заради „фундаментални закани за нашата безбедност“.
Тој вели дека Русија е „искрено заинтересирана“ за крај на конфликтот, но за да биде „траен“, тие треба да ги елиминираат „примарните причини за конфликтот“.
„Се согласувам со претседателот Трамп, како што рече, дека природно, треба да се обезбеди и безбедноста на Украина…Секако, ние сме подготвени да работиме на тоа. „Би сакал да се надевам дека договорот што го постигнавме заедно ќе ни помогне да ја приближиме таа цел и ќе го отвори патот кон мир во Украина.“
Рускиот претседател ги критикуваше европските лидери, велејќи дека се надева дека нема да го „торпедираат почетниот напредок“.
Украинскиот претседател Володимир Зеленски во понеделник ќе отпатува за Вашингтон на разговори со американскиот претседател Доналд Трамп, објави Зеленски на Телеграм по денешниот телефонски разговор со Трамп.
МИА
