Медиумите објавуваат за продолжување на артилерискиот оган на двете страни на фронтот во Бахмут, упориште на конфликтот во источна Украина, и покрај стапувањето во сила на прекинот на огнот од Русија врз нејзините војници, пренесе агенцијата „Франс прес“.
Артилериски оган се слушаше на украинска и руска страна по почетокот на прекинот на огнот во Бахмут, град чии улици беа уништени и напуштени, пренесува „Франс прес“ и додава дека огнот е спорадичен и помал од претходните денови.
Во Украина стапи на сила примирјето што рускиот претседател Владимир Путин и го нареди на руската армија за време на божиќните празници. Прекинот на огнот треба да трае до денеска 7 јануари на полноќ.
Претходно, неколку часа пред да стапи на сила прекинот на огнот, на 6 јануари, украинските власти објавија дека продолжуваат борбите во областите Бакмут и Лиман на истокот од земјата.
Шефот на дипломатијата на Европската унија, Жозеп Борел, го опиша како „лицемерие“ прекинот на огнот што Москва го објави во Украина по повод православниот Божиќ, оценувајќи го како „неверојатен“.
Претседателот на Украина Володимир Зеленски вели дека Русија зборува за прекин на огнот бидејќи сака да го искористи како фронт за да го запре напредувањето на Украина во источниот регион Донбас и да испорача повеќе луѓе и опрема.
