Регулаторната комисија за енергетика денеска донесе нови цени на нафтените горива. Сега дизелот поевтинува, а бензините поскапуваат.
Од вечерва на полноќ се менуваат највисоките малопродажни цени на нафтените деривати. Регулаторната комисија донесе одлука со која цените во просек се намалуваат за 1,06 проценти.
Еуросупер БС-95 и Еуросупер БС-98 поскапуваат за еден денар за литар. Новата цена на бензинот БС-95 е 100 денари, а БС-98 ќе се продава за 102 денари за литар.
За 4,50 денари поевтинува дизелот, чија нова цена е 100 денари за литар.
Екстра лесното масло за домаќинство поевтинува за 3 денари, па литар ќе чини 111,50 денари.
Мазутот М-1 НС поевтинува за 0,196 денари, а новата цена е 49,882 денари за килограм.
Од Регулаторната комисија објаснуваат дека врз новата пресметка влијаеле движењата на светските берзански цени и курсот на доларот. Кај дизелот светската цена е намалена за околу 6,7 проценти, додека кај бензините е забележано минимално зголемување.
Дополнително, Владата ја намали стапката на ДДВ за Еуродизелот на 10 проценти, што е применето во новата пресметка. Продолжува и примената на намалената акциза од 4 денари за литар за бензините и дизелот.
